اعترافات ومواقف طريفة ومضحكة

"مرة كنت عند صديق الي صاحب مشتل زراعي ،وكان يحاول يركب قطعة على ماتور زراعي وعند رجل كبير بالسن ،بيكون صاحب هذه القطعة , المهم كانوا حيرانين بطريقة التركيب ، اجيت انا ابو العريف وما بعرف من وين جبت الثقة ،وقفت معهم وقلت بصوت رزين ، شغلكم كله غلط والتركيب مش هيك ، اطلعوا عليا الاثنين وكاني اجيتهم من السماء ، وصاحبي انبسط قلي بتعرف كيف بتتركب ،رديت بلا تفكير طبعا ، قلت اتفضل النا ساعة بنحاول انقذنا افسحولي المجال ، فككت شغلهم واعدت تركيبه بطريقتي السحرية يلي واثق منها وقلتلهم يلا اشتبكوا الكهربا في الماتور للتجربة العملية ووقفت وقفت الخبير الشامخ حطوا الكهربا وكان المفروض الماتور يسحب مي من حنفية ويصخها في برميل ..صار يسحب من البرميل ويودي على الحنفية 🤣😂😅 عكست العملية كلها هههههه..طبعا ما استنيت ردت الفعل ،بس اخر شي شفته قبل ما اهرب نظرت الختيار يلي نزلت بنطالي من قوته 😂😂"

"اطرف موقق صار من بنتي , من يومين كانت طالبة مني غرض معين وفعلا سعره كان غالي واتحججت انو ما معي فولس اشتريه بس وعدتها اشتري قبل نهاية السنة وما استنيت رح اشتريته فلما ناديت عليها واعطيتها اياه من الفرحة صارت تحاول تحملني وتنط طن زي الصغار ههه الله لا يحرمني منهم يارب"

"اطرف موقف شفته صار مع زوجتي كنت مسافة في عمل للخارج لمدة 35 يوم , ولم رجعت من السفر ما كانت تعرف الموعد بالضبط كنت حاكيلها يومين بكون مروح , المهم روحت وقلت اعمللها مفاجاة هههه اول ما شافتني كان ابني الصغير بجانبها , من الصدمة حملته ورجعت رمته على السرير وهربت على الغرفة وبعد رجعت عند ي هههههه طبعا كل هذا صار في اقل من دقيقة ولما صحت من الصدمة بقلها شو الي صار معك قالت ما بعرف من الصدمة ما عرفت شو اعمل وصرت اتصرف بلا وعي"

"كان موقف في لحظتها غضب بس بعد ماروحت صار موقف مضحك حقيقة القصة الي صارت معي اني بيوم من الايام كنت مروح من الشغل ، وكان الجو حار جداا، بعد ما مشيت وقطعت مسافة السيارة توقفت عن الحركة فجاة ، حاولت اشغلها اكثر من مرة ولكن على الفاضية .قلت افتح صندوق الماتور اشوف شو القصة ، المهم الصندوق الو كبسة عند الشوفير كبستها ونزلت احاول افتح الصندوق على الفاضي ،ارجع للكبسة اكبسها، اروح للصندوق مايفتح 😵‍💫😫 فقد صوابي من كثر المحاولات ...بس بلحظة اتذكرت شغلة 🫢انو الصندوق الخلفي برضو الو كبسة ومع انها جنب كرسي السائق الا اني مع الطفر والحر لخبطت فيهم 🥹 واتذكرت متاخر اني كاين افتح الصندوق الخلفي 😅 هالقصة الي صارت معي كانت لحظتها عصيبة بس بعد ماروحت وكانت مشكلة السيارة بسيطة صرت في كل جلسة اضحك الناس عليا 🤣🤣"

"قصصي كلها اعترافات اني كنت اعمل هيك بزوجتي عشان اغيظها 😅 مرة كنا لسة بالخطوبة وخليتي اختي تتصل عليا برقم مجهول على انها صبية تشتغل معي هههه جننتها وبعد الزواج كنت اعمل مقالب كثير كل مقلب كان كفيل انها تتركني ..بس بعترفلكم اني كنت وقتها لسة جاهل يعني اتزوجت بعمر ١٦ عام شو تتوقعون يكون نضوجي وتفكيري ؟ بس طبعا وعيت وصار عندي عيال وربينا وكبرنا وبعد سنوات عديدة كنت اعترفلها ببعض القصص والمقالب الي كنت اعملها فيها ويمكن اخر جلسة اعتراف كان بعد ١٧ عام زواج 🥲😐🤣"

"في ليلة من الليالي جارنا ابوصبحي ضيع محفظته جوا البيت وتحديدا في غرفة الصالون قام يدور عليها في الشارع تحت عمود الكهربا شافه جارنا الثاني ابو حسن وساله شو بتعمل حكاله انو مضيع محفظته وبدور عليها تطوع ابوحسن وصار يدور معاه باهتمام وبعد تعب ساعة من البحث عن المحفظة ساله جاره انت متاكد انك مضيعها هون في الشارع حكاله ابو صبحي بكل ثقة طبعا لا ضيعتها جوه في الصالون صرخ فيه ابوحسن وحكاله اذا وقعت جوه في الصالون ليش بدور هون تحت العمود رد عليه ابو صبحي بكل هدوء وحكاله يااخي جوا البيت عتمة والله ماني شايف اشي بس هون ضو الشارع كاشف ومنور"

"هذا الموقف ذكرني بموقف صار معي زمان. في يوم من الايام كان اخوي بده يشتري سيارة فطلب مني ومن اخوتي انو نرافقه نشوفها ونعطي راينا فيها . طبعا مشينا معاه والموقف الطريف الاول انه كانت السيارة اقدم عمرا من جدي والمضحك اكثر كانت عبارة عن ملهى ليلي وقاعة افراح للقطط😅. نرجع لقصتنا ، بعد تفحصها وعدم تشجيعنا الو يشتريها ..فجاة قلنا اتخبووا اتخبواا قلناله خير شو في ..قال هذا الشخص انا بشتغل معاه وما بدي يشوفني هون ..طبعا اتخبينا علما انو لو مرينا جنبه ما بيعرفنا اساسا بس الصدمة😶انو هو يلي نادى عليها ههههه وراح سلم عليه ونادانا نشوفه ..طيب ليش عمل هيك ..الله اعلم ،😑🫡"

"مرة أمي كانت بتحكيلي: «لا تفتحي موضوع قدام الضيوف، عيب»… قعدنا مع الضيوف، وبعد خمس دقايق هي نفسها فتحت الموضوع وحكت كل التفاصيل، حتى الأشياء اللي أنا ما كنت بعرفها عن حالي 😂😭 وأنا قاعدة جنبها بطلع عليها وبفكر: مين اللي كان لازم يسكت هسا؟ �"

"أنا بحكي قصصي اللي ما بتنحكى بموقع مجهول… يعني بفضفض، بحكي وبشكي ، وبطلع وأنا مطمّنة إنه محدا عارفني إلا صاحب الموقع، عارفني وعارف كل قصصي، وما شبعت حكي على الواقع رحتله عَالمواقع 🤣"

"مسمي حالي «مفرفح»… مع إنه لو الفرح مرّ من جنبي، بغيّر الطريق. 😂💔"

"مرة كنت مستعجلة وبدّي أطلع من البيت، لبست بسرعة وأخذت أغراضي ونزلت. وأنا بالطريق حسّيت الناس بتطلع عليّ بطريقة غريبة، قلت بيني وبين حالي: «أكيد اليوم طالعة مرتبة بشكل مش طبيعي» 😂 ركبت السيارة، وبعد شوي فتحت الكاميرا الأمامية عشان أشوف حالي… طلعت لابسة شبشب بيت فردتين مش نفس بعض! 🤦🏻‍♀️😂 والأحلى؟ إني كنت مفكرة نظرات الناس إعجاب، طلعت الناس بتحاول تستوعب شو الموضة الجديدة! �"

"القصة الي صارت معي قريبة من قصتك , بس انا كنت شاري مبايل جديد وقبل ما اروح البيت مريت على دار اهلي وشغلت الموبايل فطلبت من امي الله يطول عمرها ترن عليا عشان اخزن الرقم لانو كل الارقام القديمة راحت من عندي , فبعد ما رنت سالتني شو سجلت اسمي عند انا لسة ما كنت سجلته فقلت لها سجلتك نبض روحي وانسطت كثير فقلت رح اسجله هيك بما انه اسعدها . المهم روحت البيت وكنت جايب معي اغراض للبيت وناسيها عن امي ولسة دخلت الدار لقيتها بترن عليا طبع طلع الاسم نبض روحي وكانت زوجتي لسة يادوب متزوجين 8 شهور وكانت لسة بتغار مش مثل اليوم هههه اخذت التلفون من ايدي وردت على المكالمة وطبعا عرفت انو هذي امي , فبردت اعصابها شوي لبين ما استوعبت انو جايب موبايل جديد بدون ما اخبرها ردت انجنت من جديد ههههه طبعا هذا الكلام مر عليه اكثر من 18 عام والحمد لله مازلنا مع بعض وكل شي اتغير عن اول حياتنا"

"قصة اليوم من اطرف القصص والمضحكة 🤯 كنت جالس في قعدة نقاش مع بحيشة الاثار ،كالعادة كنا نجتمع وكل واحد يحكي قصة مضحكة او غريبة صارت معاه ، فاحد اصدقائنا قال ياجماعة الي صار معنا اليوم ماصار من قبل ، طبعا ملامحة بلشت تظهر انه الموضوع مضحك 😅 قال اجانا شخص من جماعة الي بيتواصلوا مع الجن ، وقال هان في كنز بيغني بلد ، طبعا بعد طقوس ورايح جاي لحد ما وقف في المكان المحدد وقال بدكم تنزلوا اقل شي ٦ امتار ورح تلاقوا مدخل وسرداب وفيه دفين صناديق وثماثيل ذهب ..طبعا كلامه مشجع كثير ،جمعنا حالنا على انو الشغل بكرة من الصبح وكان عددنا ٥ يعني يوم بنكون وصلنا الذهب طبعا المنطقة سكنية واقرب بيت كان يبعد حوالي ١٠ م والحلو انو ابن صاحب البيت من ضمن الفرق. على الاتفاق ثاني يوم الساعة ٦ صباحا كنا في الموقع وشغل مثل الحفريات طبعا للساعة ٦ المغرب ماكان في طاقة للتكملة ،بس كنت نزلنا حوالي ٤ امتار يعني صرنا على بعد مترين من الذهب ، روحنا ورجعنا ثاني يوم وبدا الشغل بهمة جديدة بس حسينا التراب صار فيه رطوبة ورائحة كريهه ..اتصلتا على الخبير قال ممتاز انتو بالمكان الصحيح ، وهذي علامات قربكم من الذهب ..هون احنا صارت طاقتنا الضعف ساعتين كنا نزلنا متر وكانت الرطوبة زادت ..هون احنا كنا ثلاث داخل الحفرة و٢ خارجها ، شفنا صخرة متوسطة ، قلنا اكيد هذي تسكيرة المدخل رغم انها صغيرة بس اقتنعنا انها تسكيرة سرداب ، المهم شلناها بصعوبة وياريت ماشلناعا🤢🤮 فتحت علينا مجاري الجار 🤣🤣 كنا حنموت لولى اصحابنا الي فوق سحبونا الصراحة لو مسكنا الخبير كان نزلناه فيها هههه بس لما سمع بالقصة اتبخر وما عرفنا طريقه لانو اساسا ما كان من البلد ..وهذي القصة الي صار معي طبعا انا كل مكان بروحه بحكيها ويدسلامتكم"

"في صديق الي اسمه روحي وطبعا اكيد رح ادون اسمه على هاتفي روحي بنفس الاسم في يوم من الايام كنت نايم على الكنب قيلولة الظهر وكان التلفون موجود في الشحن على طاولة المطبخ . واثناء تحضير زوجتي للغداء رن التلفون .وكونها قريبة منه شافت اسم المتصل ...وهنا التحول المفاجئ حملت التلفون واجت طيران عليا مين هذي روحك الي بتتصل فيك 🤣 صحيت مفزوع روح مين وشو ..مسكت الجوال قال اتفضل ..انا لما شفت الاسم ضحك حكيتلها هذا صديق الي اسمه روحي ..طبعا ماصدقت وكان خلصت الرنة اثناء النقاش ، وما حلت عني الا لما ارجعت اتصلت عليه وسمعت صوت رجل يتكلم بردت اعصابها اتبسمت بهدوء ورجعت تكمل طبخ كانو ما صار شي هههه هذا الموقف المركب الي حصل معي مابين موقف مفزع لما صحتني وموقف طريف عن الغيرة الهبلة للنسوان 🤭🤭"

"مرة كنت ماشية بالشارع وعين الله عليا فجأة سمعت صوت بنت بتنادي بقمة الحماس وينك زمان عنك شو اخبارك شو هالصدفة الحلوة تلفتت حواليا لقيت بنت جاي ومدت ايدها تسلم وابتسامتها واصلها لاذنيها طبعا انا ما عرفتها بس عشان ما احرجها ابتسمت نفس الشي ومديت ايدي لاسلم عليها وقلتلها اهلاااا كيفك شو اخبارك وين هالغيبة وبس وصلت لعندي تجاوزتني بلمح البصر وراحت تسلم على صبية كانت واقفة وراي بالضبط طبعا انا صرت في موقف لاحسد عليه ضليت رافع ايدي على اساس برتب بالشال وضليت ماشية بدون ولا كلمة"

"الموقف صار معي شخصيا .كنت مرة في سوق الخضار ، ودخلت ملحمة خراف وعجول ، فطلبت من صاحب الملحمة انو يقطع لي ٣ كيلو لحم من ذبيحة ،بعد ما قطعها اخذها على المفرمة وكانت وراء ساتر ،يعني ماعدت شفته .المهم ما صار لحظات الا شخص بقلي تفضل بشو بقدر اساعدك التفت ،ارد عليه والصدمة 🫪نفس الشخص الي فات من ثواني ...هون انا ما عرفت شو اقول خصوصا انه من لحظة فات والي اجا مش من نفس الاتجاه ،يعني مستحيل بنفس السرعة يكون هو الي اجا وكمان انا قلتله طلبي فليش يقلي بقدر اساعدك ...هو وبعد صفنه قلتله عفوا مش من لحظة اخذت تفرم لحمة حسب طلبي ؟! من وين طلعتلي بهالسرعة 👀 ضحك ضحكة طويلة وضرب كفوه ببعض وبلحظة طلع الشخص الثاني هههه طلعوا توائم متشابه بدرجة كبيررة جدا خصوصا لشخص اول مرة يشوفهم ...طبعا طلعوا بيحبوا يعملوا مقالب في الناس والصراحة سبحان الله تحس فيهم قبول ، حتى متناغمين مع بعضهم بدرجة عالية"

"بصراحة موقفك رجعني لمواقف الطفوله ههههههه صحيح مش متشابه الموقف بس اتذكرت ومشى الحال الي صار معي كنت صغير وكنت ماشي مع اخوي نازلين نلعب على الحارة ، ما بعرف كيف اخوي وقف وما انتبهت بس انا ضليت ماشي مع شخص ثاني ، والغريب اني كنت احكي معاه مش بس ناديت عليه ، وهو ماشي معي ومسلك الوضع هههه بس لما صرت اسال وما يرد استعملت علقي وفكرت اني اطلع عليه ، بس اكتشفت انو مش اخوي ، شخص غريب وبيضحك على المقلب الي صار فيا ، وانا بلا وعي رجعت ركض لحد ما لقيت اخوي والكارثة كان واقف مع صاحبه ، وناسي اني معاه . متذكر عملتله عرس طويل وعريض ههههه الله على ايام زمان والمواقف الحلوة"

"بصراحة كان موقف محرج جداا كنت نازلة من السوق وكنت حاملة بايدي اغراض منها ادوات مطبخ ، ولما نزلت الدرج باتجاه الشارع انزلقت رجلي ع الاسفلت ووقعت على ظهري ، اذكر حتى شي من أدوات المطبخ يمكن كان مفرمة اجت بوجهي ههه الصراحة كنت محرجة جدااا وفورا قمت كانوا ماصار شي لانو كل الناس اجت تساعد والصراحة خجلت كثير لانو كانوا شباب شكرتهم وقلت اني بخير ، ومشيت وكل عظمة في جسمي بتمشي لحالها😅🤭"

"السلام عليكم نكمل قصص البحيشة الي ما بتخلص ههه قصة اليوم كانت من سنوات لما كنا ننقب في احدى الخرب القديمة , اثناء الحفر وجدنا مدخل مغارة كلنا اجا الرزق فتحنا الباب وتركناها لتتهوى خوف من الغازات السامة ولما صارت العتمة دخلنا ، كانت كلها تراب ، بس لانو عددنا كبير نظفنا الجزء الاكبر بسرعة والمفاجاة الى حصلت المنطقة الى تركناها بدون تنظيف كان المدخل وعشان ما حد يكشفنا طفينا الانوار والشمع وصرنا نشتغل على العتمة ، وبلحظة شعرت انه ايدي مسكت شي تحت التراب على شكل جرة مقلوبة ، ضربت باصبعي عليها صوت فخار هو وقفت وقلت للشباب خلص زبطت معنا المرة ، وداعا للفقر لقيت الكنز ، طبعا فورا الشباب اتجمعوا عندي ، صرت انظف حوليها بهدوء بلاش تنكسر وطبعا على العتمة . واخيرا اطلعتها ودخلنا لقلب المغارة نتفحصها واول ما شعلنا الشموع كانت الصدمة الجرة عبارة عن جمجمة بشرية من العصر الروماني هههههه بس للحظة الى صار معنا انو قلبنا ضحك بدل ما نبكي على حظنا ،،، وهذي من يوميات بحيش اكيد عندي الكثر من القصص الحقيقية رح اكتبها ان شاء الله"

"اطرف موقف صار معي في الجامعة ، كان فصل الشتاء وكنت لابس طاقية صوف من ايام جدي 😅 وما كنت منعم ذقني ، فاول ما فتت الجامعة سمعت واحد بينادي عليا ..يا عم وقف وقف ..لفيت راسي طلع مسؤول الامن ، سالني مين حضرتك وشو جاي تسوي ع الجامعة هههه قلتله عم ايش ياعم انا طالب ، ما صدقني الا لما شاف البطاقة وفحص عليها ، ودخلني وهو مش مقتنع اني طالب جامعة وما اخبي عليكم فعلا ماكان هيئة طالب 😅 هذا احد اطرف مواقف الجامعة الي حصلت من سنوات معب"

"القصة الي صارت معي لما كنت في الثانوية العامة ،كان في إضراب مواصلات ،روحت يومها مشي انا وصديق الي ،المهم شفنا مجلة ممزقة ع الشارع ،وقعدنا نجمع فيها ،والي صار معنا انو ما انتبهنا انو في يافطة حديد مربعة ،بنفس اللحظة ضربن روسنا فيها هههه😅 صحيح كان في الم بس اتحملنا عشان الناس انتبهت لصوت رؤوسنا في صاج اليافطة 😅 اكيد هالمشهد صار مع غيرنا ....ايه هالقصة مضى عليها حوالي ٢٢ عام"

"الصراحة الموقف من اكم يوم ورغم انه طريف بس كان محرج بنفس الوقت😅 كنت رايح السوبر ماركت وكان الباب زجاجي ، ونظيف ولاني كنت موقف تاكسي نزلت منه بسرعة عشان ما اعطل الركاب واجيب علبة دخان المهم الباب لانه زجاجي ونظيف ما انتبهت وفكرت مفتوح وطبعا ضربت فيه بقوة واجيت على ظهري ههههههه الصراحة كنت ناوي اعمل مشكلة مع صاحب الدكان بس لما انتبهت للركاب ، عملت حالي ما اتاثرت ، وضحكتهم كانت عالية 😔 هذا الي صار معي والناس غيرت جو على حسابي 😅"

"الي صار معي اني كنت ماشي في ممر طويل مكان ما بشتغل ، وكان معي المدير وبعض الموظفين ، وكنت منهمك بالحديث معهم وما انتبهت لخزانة معلقة في الممر وضرب راسي فيها ، والصوت عبى المنطقة 😅 طبعا اتوجعت كثير بس قلت ياولد لاتشمتهم فيك ، المهم كملت حديث ولا كانو صار شي ، علما كنت شايف طيور بتحوم فوق راسي ههههه هذي قصة صارت معي من مواقف مشابه كثير بتصير مع الناس 🤣🤣🤣"

"ياجماعة النوم بيجيني كل وقت الا وقت النوم بغيب وما بعرف وين بروح هههههههههه حدا مثلي ولا وحدي هيك"

"البلد كلها شغالة ديليفري الي مابيوصل طلبات بيوصل كلام 🤣 قصة قصيرة بس حقيقة"

"ابو الجود هو شخص بسيط ساكن بنفس العمارة الي انا ساكن فيها قرر في يوم انه يبيع سيارته الكيا التعبانة السيارة واقفة عالحديدة وماشيه علدعاء وشكلها ببكي بس هو غسلها ونزلها عل سوق ليبيعها اجا واحد شاري بلش يلف حوالين السيارة فتح غطى المحرك وقال بغلاظة : ابو الجود الماتور بقح وبطلع منه دخنة بيضا شكله بدة عمرة كاملة. ابو الجود طلع فيه ببرود وقله بلهجة حورانية ثقيلة :هاد الماتور قاعد بيصلي عالنبي من كثر ما هو مبارك بعدين تعا لقلك سيارة بتمشي وتبخرلك بخور ببلاش وين بتلاقيها ؟ الشاري صفن فيه وفطس ضحك وضحك كل السوق معه"

"اليوم تذكرت موقف صار لي السنة اللي فاتت، وتحديداً بوقت الشتاء، وكل ما طرى على بالي وجهي يحمر من الفشيلة! كنت ماشي بالشارع، والجسر والمطر مخلين الأرض تلمع، وأنا لابس الكوت ومسوي فيها رزينة وحركات. كنت أمشي بكل ثقة وأنا مجود قهوتي، فجأة وبدون أي مقدمات... تبلطخت! ريل رايحة يمين وريل رايحة يسار، وصرت أرقص سامري بالشارع أحاول أوازن نفسي عشان ما أطيح. الموقف كان درامي لدرجة إن قهوتي طارت بالسما ونزلت علي قطرات مطر وقهوة بنفس الوقت، وطحت ذيك الطيحة المحترمة اللي يسمونها "سجدة السهو"! الشارع كله وقف، والناس اللي يمشون واللي بالسيارات ماتوا من الضحك، وأنا أحاول أرقص الرقعة، قمت مسرع وسويت نفسي أسوي إطالات وتمرين لرجلي عشان أصلّح الموضوع! بس الفشيلة كانت كبيرة، خصوصاً لما جاني واحد وقال لي بكل طيبة: "سلامات يا الطيب، الأرض زلقة ولا تسوي ستريتشينغ بالشارع؟" كان موقف يموت ضحك وأحرجني صدق، بس ضحك الشارع كله معي ديك الليلة، وصارت السالفة أطرق موقفي الشتوي!"