اعترافات ومواقف غريبة وصدف ما تُصدّق

"القصة الي صارت معي تكررت مرتين ،كنت في الشغل وبالتحديد الساعة ١٢ هي الساعة الي بشعر فيها بالجوع🤤 خطر في بالي الطبخة الي ممكن تكون زوجتي طبختها ، وبالفعل ارسلتلها رسالة قلتلها انت طابخة كذا وكذا اليوم ..طبعا هي تسمرت واول سؤال الها شو عرفك ،قلتلها العصفورة ههه طبعا انا اعتبرته مصادفة بس بعد ٣ ايام صار نفس الشي ، خطر في بالي شو ممكن تكون طابخة ورغم بعد الطبقين عن بعض الا اني قدرت اعرف ...الصراحة هالموقف الي صار معي حسيته غريب وممكن يكون مصادفة ..بس حدا حصل معاه هيك موقف غريب او عنده تفسير 👀"

"بصراحة وممكن ما تصدقوني , الي صار معي في يوم من الايام كنت بدي انده على اخي , وبدل ما انده عليه باسمه ندهته باسمي ،،،، صح الموقف غريب بس يبدوا انا كنت مشتت بشكل كبير وهذا موقف كان غريب حتى اهلي انصموا لانو مش سهل الواحد يخطئ وينادي غيره باسمه"

"السلام عليكم , انا انسان هاوي بحث عن اثار وكثير مواقف بتواجهنا اثناء عملنا ، خصوصا لما يكون الشغل في الليلة وهذي اول قصة لي وهي قصة رعب حقيقي عشناها داخل مقبرة رومانية من سنوات كنت انا وصديقي الي نشتغل داخل مقبرة رومانية على امل يتعدل حالنا بقطعة اثرية ولا جرة ذهب هههه بس طبعا المنحوس منحوس ههههه بدون ما اطيل كانت ليلة شتاء والدنيا مطر وخير نزلنا داخل المقبرة وهي طبعا معزولة عن الامطار شغلنا الشمع لانوا الداخل معتم وبدانا نقلت الترابة والحجارة من مكان لمكان . وفجا طلع صوت ارجل فوق سطح المغارة وكانه فرقة جيش واصوات بساطير . في لحظة طفينا الشموع واتخبينا اخر المقبرة وقلنا اكيد هذي كبسة علينا وانكشف امرنا ، مر دقائق وما حدا نزل علينا ومر كمان نص ساعة نفس الشي ما حدا ظهر ، قلنا اكيد بيستنوا نطلع ومن باب الاستسلام طلعنا بس المفاجاة الكبرى ما في اي شي ولا اي انسان فوق ؟؟ رجعنا داخل المقبرة ورجعنا نكمل شغل ما هي الا دقائق رجع صوت الضرب فوق المغارة طلعنا بسرعة البرق نشوف شو يلي بيصير والله يا جماعة الخير زي الكذب , لفينا كل المنطقة حتى لو نلاقي حاشاكم كلاب نتهمها ما كان في ولا شي واساسا كانت مطر وبرد وهذا كان اخر يوم الي في هالمقبرة بعد الرعب الي صار بس طبعا لي قصص ثانية في مواقع ثانية رح اذكرها ان شاء الله هههههههههههه الي عنده تفسير يخبرنا بس لاحد يقول رصد ههه"

"السلام عليكم ورحمه الله قصتي حقيقية وصعبة كثير انا متزوجة من ١٢ سنة وزوجي كان انسان محترم جدا وملتزم ولكن من سنة تغيير كلياا . خناق متواصل وترك صلاته سهرات للصبح وسكر ، كل هالقصة صارت في سنة وانا بحاول افهم شو غيره ، حتى اهله ما بيوصلهم ولا عارفين شو صار معاه ، اي مشكلة يهدد بالطلاق ، وانا وحيدة مالي غير والد وبنت وعايشة معاه في بلد ثاني شو اعمل لارجعه بدون ما اخرب بيتي خصوصا اني فكرت ابلغ عنه الشرطة انه بيضربني بس خايفة من النتائج"

"الموقف بصراحة من اغرب المواقف الي حصلت معي والقصة الغريبة باختصار كنت بستنى اخوي في السيارة بدي اروح البقالة واثناء الانتظار سهيت للحظة وفي هذه اللحظة شفت نفسي مشيت بالسيارة وتوقفت عند البقالة اشتري خبز وما لقيت، رحت البقالة الثانية الي مابتبعد عنها يادوب ٥٠م ، وشفت ابن عمي طالع من البقالة واشرلي بايده رد السلام ، هو فقت انا والي شفته صار معي بالحرف الواحد ، حتى ابن عمي بنفس الهيئة والمكان الي شفته فيه ..مابعرف هي صدفة ولا شو بالضبط الي صار ، لو حدا عنده تفسير منطقي او واجهه قصة حقيقية قريبة ياريت يخبرنا"

"البلد *صارت كلها مشاهير… الشهرة صارت بدها متابعين مش إنجازات. * صارت كلها ذكاء اصطناعي… حتى الكذب صار إله صياغة احترافية. *صارت كلها بنوك… اللي ما معاه مصاري، معه ديون.😅😅"

"البلد صارت كلها مخرجين… كل واحد مصوّر حياته فيلم. اتدبروهاااا"

"هالموقف الغريب الي صار معي من اغرب المواقف الي واجهتني في حياتي كان عمري تقريبا ١٧ سنة لما طلبت امي اني اروح الارض لحمايتها من لصوص الاشجار وكان وقتها موسم التين ..بعد يمكن ربع ساعة غلبني النعاس فقلت انام شوي تحت التينة وكانت شجرة عملاقة ، مايعرف كم مضى من الوقت والصدمة حسيت نفسي مربط وكان حولي صوت طبول وكانه في اشخاص ربطوني وبيرقصوا حولي ومعهم طبل ..حاولت انهض ماقدرت وبعد محاولات عديدة قدرت افتح عيوني وقمت مفزوع من هول الموقف، بس الغريب مالقيت حدا حولي ولا عرفت شو يلي صار للأمانة هذي القصة صارت معي وما عرفت تفسيرها… ناس بيقولوا جاثوم وناس بيقولوا غير هيك. حدا صار معه نفس الشي؟"