قحطاني

"الصراحة الموقف الي صار في يوم من الايام كنت ماشي في الحارة ، كان اعزكم الله كلب محاصر قطة صغيرة ، فقلت لازم انقذها اقتربت من الكلب وباللحظة الي شفتها مناسبة ضربت على تنكة حديد حجر ، اطلعت صوت وفعلا خاف الكلب وهرب بس للاسف كمان خافت القطة وهربت لجهه الشارع ولسوء الحظ ، بلحظة مرور سيارة ، دعستها 😔 يمكن لو خليتها للكلب كان قدرت تحرر نفسها ..بس هذا الي صار"

"في صديق الي اسمه روحي وطبعا اكيد رح ادون اسمه على هاتفي روحي بنفس الاسم في يوم من الايام كنت نايم على الكنب قيلولة الظهر وكان التلفون موجود في الشحن على طاولة المطبخ . واثناء تحضير زوجتي للغداء رن التلفون .وكونها قريبة منه شافت اسم المتصل ...وهنا التحول المفاجئ حملت التلفون واجت طيران عليا مين هذي روحك الي بتتصل فيك 🤣 صحيت مفزوع روح مين وشو ..مسكت الجوال قال اتفضل ..انا لما شفت الاسم ضحك حكيتلها هذا صديق الي اسمه روحي ..طبعا ماصدقت وكان خلصت الرنة اثناء النقاش ، وما حلت عني الا لما ارجعت اتصلت عليه وسمعت صوت رجل يتكلم بردت اعصابها اتبسمت بهدوء ورجعت تكمل طبخ كانو ما صار شي هههه هذا الموقف المركب الي حصل معي مابين موقف مفزع لما صحتني وموقف طريف عن الغيرة الهبلة للنسوان 🤭🤭"

"كنا اليوم طالعين من صلاة الجمعة والي لفت انتباهي ، شخصين بقدر اعمارهم يمكن 50 و57 واقفين تحت اقدام ابوهم الي بيبلغ من العمر تقريبا 80 عام بس ماشاء الله صحته كويسة وعمال بيتسابقوا في تلبيسه الحذاء اعزم الله ، ورغم وجود ابناءهم كانوا رافضين حد يوخذ مكانهم . لبسوه ووضعوا على كتفه عباءة وامسكوه العصاه ومشوا معاه كانهم حراس الو . حتى واحد منهم شال كاقية عن راسه وحطها زي خيمة تحجب الشمس عن ابوه لغاية ما وصلو السيارة يا الله ما احلى بر الوالدين🤲 ، ورحمه الله على ابي 😔"

"الصراحة الموقف من اكم يوم ورغم انه طريف بس كان محرج بنفس الوقت😅 كنت رايح السوبر ماركت وكان الباب زجاجي ، ونظيف ولاني كنت موقف تاكسي نزلت منه بسرعة عشان ما اعطل الركاب واجيب علبة دخان المهم الباب لانه زجاجي ونظيف ما انتبهت وفكرت مفتوح وطبعا ضربت فيه بقوة واجيت على ظهري ههههههه الصراحة كنت ناوي اعمل مشكلة مع صاحب الدكان بس لما انتبهت للركاب ، عملت حالي ما اتاثرت ، وضحكتهم كانت عالية 😔 هذا الي صار معي والناس غيرت جو على حسابي 😅"

"السلام عليكم هذي القصة يا اخواني حصلت معي ، وحبيت انقلها للجميع لاخذ العبرة .وكيف تسبب هذه الغلطة في اصابتي بالتهاب البروستاتا المزمن كنت اعمل في فرق المطافي او ما يسمى ببعض الدول العربية الحماية المدنية ، واترشحت لدورة انقاذ مائي لدولة اسكتلندا ، وكان مدتها اسبوع فقط ، كنت ننزل النهر للتدريب مع الفريق الاسكتلندي وكان هذا في شهر 4 على ما اذكر بس كانت اجواء باردة واغلب الايام ماطرة ، لذلك كنا نلبس 4 بدلات متخصص فوق بعضها عشان ما توصلنا المي وفي يوم من الايام وصلت النهر تقريبا الساعة 8 صباحا وكنا لابسين البدلات وبعد ما نزلت المي شعرت اني بحاجة لاقضي حاجتي ( بول اعزكم الله) وكان مكان النهر مكشوف وصعب اتوارى بشجرة او سور ، وكمان لازم حدا يساعدني في فك البدلات لانو صعب شخص لوحده يفكها ، والاكثر حرج في القصة انو كان معنا مترجمة مش مترجم فقلت خوفا من الاحراج بتحمل ، ضليت وكل ساعة يزيد الوضع سوء ، لدرجة كنت بدي اعملها على حالي ، انتبه الفريق الي معي واحد الاشخاص خبر المترجمة ، كان يمكن الساعة صارت 12 ـ او 1 ، المترجمة حكت للمسؤول الاسكتلندي وخبرها انو المنطقة ما في مكان لقضاء الحاجة ، وبل ما يرجعني للفندق او اقرب مكان عام ، ما اكترث لحد ما انتهي التدريب الساعة 4 العصر وكان وضعي سيء جدا وصعب ، ومن هبلي ما نزلتها في البدلات وشو ما صار يصير ، المهم السائق انتبه وزاد السرعة ووصلني لاقرب مركز تابع الهم ،، بس الي كان ينتظرني اسوء ما توقعت ما قدرت انزل ولا نقطة ماء وكان المي اتبخرت طبعا مع الم ،، رجعنا الفندق وصرت اروح الحمام على مراحل لحد ما اترحت بس الكارثة الكبرى انو حصر حالي طوال هذه الفترة عملي مشاكل في جهاز البول ، وصرت اعاني من التهاب البروستات المزمن ، بسبب حصر البول الحادثة صارت معي من 10 سنوات وبشعر اني لليوم بعاني منها خصوصا تكرار الالم الي اول ما شعرت فيه كان بعد حصري لساعات يمكن القصة ما تهم ناس كثير ، بس رسالتي منها اياكم توقعوا في موقف صعب مثل الي وقعت فيه حتى لو كانت النتيجة فيها احراج او خجل ، الصحة اهم من كل شي ، والتهاب البرويستاتا المزمن مرض متعب وبسبب تقطر البول وصعوبة خروجه بالاضافة للالم المصاحب لحصر البول وتحياتي لكم جميعا"

"لو تسألني نفسك في ايه ..؟ اقلك بستر ربنا يرافقني حتى القبر اللهم استرنا فوق الارض وتحت الارض ويوم العرض عليك"

"اسمع هالقصة الحقيقية المؤثرة ولتكن لنا فيها عبرة القصة قبل فترة كنا قاعدين في جمعة شباب ما بتذكر شو كان سبب الجمعة يمكن ميتم او حدث جمعنا المهم احد الاشخاص حدثنا عن قصة حقيقية حصلت قصة مؤثرة وفيها عبرة كبيرة ، بيقول كان في شلة كل نهاية اسبوع تروح حانة يسكروا والعياذ بالله وكان واحد فيهم كل ما يطلع من الحانة شو بيكون معاه فلوس يعطيها لمراة جالسة مقابل الحانة طلبا للمساعد ، فقال كان يتكرر الموقف كل اسبوع / وفي يوم من الايام رحت عليه وقلتله شو راييك الليلة بدل ما تروح تسكر تعتذر للجماعة وتيجي معي تتوضى وتصلي ،لعل الله يغفر لك لاني شايف فيك الخير وبشوفلك لما تتصدق ،، قال صفن شوي وقال خلص الليلة بكل الاحوال تعبان وما بدي اروح وفعلا اعتذر للشلة بحجة انه تعبان ووافق انه يتحمم ،والالتقاء على صلاة العشاء ،، والصدمة في القصة كانت ان الشاب في صلاة العشاء سجد ولم يقم بل توفاه الله ساجدا ،،،سبحان الله كان يريد له الخير ولايريد له الموت بمعصية ، هذه القصة الواقعية المؤثرة احببت ان انقلها لكم لعلها تكن عبرة لنا جميعا ،،هل سمعتم بقصص مشابه لها"

"الصراحة كان موقف محرج جدا ويوم من أطول ايام حياتي ، كنت بشتغل بليط ولسة اول يوم شغل الي بشتغله بدون مايكون معي المعلم اول شغلة كانت تبليط مدخل بناية وكان واقف فوق راسي صاحب البناية ومهندس صابني ارباك شديد وانا لسة بسحب بخيط التأسيس بتذكر يوم كامل لعرفت احط ٤ بلاطات مقاس ٦٠*١٢٠ وانكسر معي يومها بلاطتين من تعاسة الموقف ههههه ،بس ربنا سهل ومشت الامور ثاني يوم . كنت بتوقع كلمة الله معك من صاحب المنزل خصوصا لما كان المهندس يتطلع عليا ويهمس اله ، هذا من اصعب الايام الي مرت عليا في بدايات الشغل واكثر موقف كان محرج جداا إلي..حدا واجه موقف مشابه؟"

"الصراحة نسيت الجوال شغال بعد مكالمة مع المدير وكنت مركن اني سكرته وبلشت سلخ فيه والسماعة مفتوحة هههههه"

"تخيل تشتغل في مؤسسة ،وتكون تتعامل مع الجميع باحترام ،بس كل ماتقعد مع موظف يعمل تشريح للموظف الاخر وهيك مع اغلبية الموظفيين نميمة ، وغيبة ، والمشكلة تطلع انت دقة قديمة لانك مابتحب تشاركهم شو موقفك لو صار معك مثل ماصار معي ..موقف مش مضحك والاغلب شي مخجل 😔 لو صار معك مثل ما#صار_معي شو بتعمل ،بتجامل وبتحكي على زملائك ولا تلتزم الصمت لوجه الله ؟ ردك بهمني #مواقف_طريفة_الشغل"

"تخيل لو كنت في حفلة قريب واخر الحفلة والناس تودع في بعضها رح مديت ايدك تسلم على زوجت عمك الكبيرة في السن ومديت ايدك وما سلمت وقالتلك اسف ما بسلم على رجال ، اكيد الكسفة رح تكون كبيرة خصوصا في جمع كبير شو موقفك ؟ فكر فيها"

"صارلي اكثر من 10 سنوات بفكر اعمل مشروع وكل ما اوصل لفكرة اتعثر بسبب المادة والمشكلة بعد فترة قصيرة غيري بنفذ الفكرة وبتنجح معها صار معي هالشي اكثر من مرة بس في الاخر بقول قدر الله وما شاء فعل لعله خير #صار_معي"